Elkarrekintza beti egon da bere lanetan: dantza egiteko atsegina beste pertsona batzuekin partekatu, dantzatzeko plazeraz gozatu teknikoa ez den leku batetik, baizik eta muinetik, keinuetatik, leuntasunetik. Topo egite bakoitzean eta begirada bakoitzean beste gauza batzuk ikusten ditugu.

Artea normalean iritsi ezin den tokietara bideratzea interesatzen zaionez, agertoki berriak bilatzen ditu, eta bere lana zahar-etxeetara edo ospitaleetara eramaten du, bertako zurruntasuna eta ohikeria gainditu eta artea sortzeko aukera zabaltzeko.

Xabier Irigibel Urizekin eta Rodolfo Seasekin batera Inések Rescoldos kolektiboa sortzen du, arte bisualak eta eszenikoak, eraldaketa sozialeko prozesuekin, aniztasunarekin eta komunitatearekin lotzea helburu duena.

Rescoldosek suaren azken txingarrak ekartzen ditu gogora, errautsek gordetako hausberoa.
Rescoldo hitzak ere hondarrei egiten die erreferentzia, bezperan soberan gelditu zenari.

www.rescoldos.net

«Esferas» proiektuaren xedea gorputza ikertzea zen, inprobisazioaren eta mugimenduaren esplorazioaren bidez. Horretarako, ikuspegi eta begirada ezberdinak zituzten lau pertsonaren arteko elkarrizketa baliatu zuen: adineko pertsona bat, haurdun zegoen emakume bat, neskato bat eta dibertsitate funtzionala zeukan pertsona bat.

Danza Contact modalitatearen helburua mugimenduaren kontzientzia eta gorputzen arteko komunikazioa dira. Beste batekin elkarreraginean osatzen den mugimendua da, gidatzen duzun eta lerratzen zaren bitartean, gidaria nor den jakin gabe, koreografiarik ezta gidoirik gabe, inprobisatzen uneoro. Pertsona guztiak dantzariak garela funtsezko printzipioa da berarentzat. Horregatik hartzen ditu eguneroko keinuak inspirazio iturri gisa.