Naturari arretaz behatzea, bizi garen lekuei erreparatzea eta oinez ibiltzea, haiek aztertzeko metodo gisa, funtsezkoak dira bere azken lan artistikoan. Bere lan asko ibiltze horretatik eta arretaz behatzetik sortutako elementu, pentsamendu edo bizipenetatik abiatuta eginda daude.

Collagea eta animazioa erabiltzen ditu maiz irudiak sortzeko. Bi teknika horiek aukera ematen diote artisautzaren eta digitalaren arteko konbinazioa aztertzeko, eta, aldi berean, oso eraginkorrak dira munduari buruzko irudipen eta irudimen berriak zuzenean eraikitzeko. Naturala eta egunerokoa den horretatik, begirada arreta adi baten pean, sortzen da apartekoa.

Mapas erakusketan, paseoetan jasotako elementu natural txikiekin sortutako collage handiek, hurbileko errealitatearen ikuspegi berezia proposatzen dute: eredu simetrikoetatik sortutako munduak, non gizakiak eta landare-espezieak modu sinbiotikoan bizi diren. Sortzen diren ibilbide errepikakorrek gure eguneroko ibilbideak aipatzen dituzte, eta obretan murgiltzea eskatzen duen begirada pausatuak, Marisak erreibindikatzen duen behatze arretatsura eramaten gaituzte.

Marisak, Mikel Usetxi nekazari biodinamikoarekin batera, Comunidad de Observadores osatu du, eta kolektibo horren helburua ingurunearekin begirada eta harreman modu berriak sortzeko dinamikak aktibatzea da. Ibilaldiak proposatzen dituzte, parte-hartzaileek aurkitzen dituzten landareak zehatz-mehatz aztertzeko. Jasotako marrazkiak eta argazkiak software sortzaile batekin editatu eta prozesatzen dira, aurkikuntzen irudi berriak sortuz.

Ibilera keinu iraultzailea, munduan berriro kokatzen gaituena, esperientzia estetikoa edo askatze- edo erresistentzia-ekintza izan daiteke. Marisak ideia hori aztertzen du pentsalari, artista edo antropologo askoren urratsei jarraituz, besteak beste, Rebecca Solnit, Hamis Fulton, Henry D. Thoreau eta David Le Breton.

https://traficantes.net/libros/wanderlust