Ahotsaren esplorazioa eta esperimentazioa da bere lan-lerroetako bat. La Voz Presa ahots-performancean, bere ahots hutsarekin esperimentatu eta jolasten du, soinu-geruzak sortuz, loop makina baten teknologiarekin nahasiz eta hura hedatuz. 2020ko konfinamenduan bizitako esperientzia eta sentsazioetan inspiratu zen, eta gerora etorri zen grinaz eta beharraz ere bai, ahotsa berreskuratzeko, altxatzeko, eta ahots oro preso dirudien garai geldiarazle horren ondorengo bizitzara bueltatzeko.

Peruk txikitatik abesten zuen, baina abesteari utzi zion. Epe luze baten ondoren, 2012an, «mugitu gabe bidaiatzeko» beharrak bultzatuta, ahots hori berreskuratu eta abestiak sortzen hasi zen. Geroztik, hainbat disko kaleratu ditu, eta berak konposatu, abestu eta instrumenturen bat jotzen du haietan. Ahotsa da bere abestietako instrumentu nagusia; hortik abiatzen da konposatzeko, eta harekin adierazten du eta konektatzen du hoberen bere buruarekin eta gainerakoekin.

Uholde batek eraldatu zituen familia-diapositiba batzuk aurkitu ondoren, ikus-entzunezko bi proiektu egin zituen Peruk, eta bietan, zuzeneko ahotsa eta txikia zenekoa funtsezko materiala dira, beste soinu batzuekin batera. Ura sartu zen barrura film laburrean, haurtzaroko irudi horiek garai berean grabatutako audioekin konektatu zituen. Uraren oldea kontzertu bisualean, irudi horiei, proiektatuta oraingoan, bere musika eta ahotsa gehitu zizkion zuzenean, loop efektuekin, pantailatik harago doan esperientzia bat eskainiz ikusleei.

http://centrohuarte.es/blogh/category/peru_galbete/

Peruren lana lotu egiten da euskal abangoardia musikalaren kantautore eta poeten genealogiarekin; Ez Dok Amairu taldeko kideekin hain zuzen ere, 60. hamarkadan euskal kultura eta musika berreskuratzen eta berritzen aritu zirenak. Herentzia hori biltzen du Peruk, eta, bere erara, bilaketa eta sormen-esperimentazioko bide hori jarraitzen du, kulturari eta hizkuntzari estu lotua, eta hein handi batean Mikel Laboak hasitakoa. Azken horrek, Lekeitioak bezalako konposizioetan, oihu, errepikapen eta soinu onomatopeikoekin esperimentatu zuen, modu pertsonal zein berritzaile eta aurreratzailean.

https://www.youtube.com/watch?v=xIvnG8AhdUY