Bere lanean etengabe egiten zaio erreferentzia natura hilari, maila estetikoan zein kontzeptualean. Historikoki, genero horrek begiradatik kanpo geratzen den eta gizakia kanpoan uzten duen espazio isolatu batean dauden objektu natural eta artifizial batzuen errepresentazioa izan du oinarri. Gizatiarra den hori, bizitzaren iheskortasunari lotua, metaforikoki baino ez da errepresentatzen, objektuen bidez.

Sararen lanak hiru oinarri-erreferente ditu: Espainiako natura hilaren pinturarekiko interesa erreferente estetiko eta kontzeptual gisa, gorputza parte-hartze eragile eta performatibitate-espazio gisa eta elikagaiak aurrekoari eragiteko aukera gisa.

Miga lanean, piezak bi egoera ditu: toska esmaltatuzko eskultura eta benetako ogi beltza (15 egunean behin oratu eta labekatzen da eta bisitariei ematen zaie). Zeramikazko pieza jandako eta partekatutako ogi biribilaren moldeetatik sortzen da eta fase ezberdinetan erakusten da (osorik, zati bat gabe, ogi biribil erdia eta apurrak). Lana elkarrekin ongi moldatzearen ideian oinarritzen da (gaztelaniazko “hacer buenas migas”), izan ere, norbaitekin ogia eta denbora partekatzeak harremana errazten du.

Fuegos de alto grado proiektuan gizakien, gizakiak ez direnen eta bizi garen lurraren arteko harremanak birpentsatu nahi ditu eta mikroorganismoen eta gizakien arteko komentsalismoaren ideia ikertzen du. Lehenik, inguruan hartutako buztinarekin ontziak egiten ditu; gero, tokiko zerealen eta lekaleen hartzitze luzeko hainbat prozesu jartzen ditu martxan eta jaten daitezkeen loreak eta uztan bildutako elikagaiak eransten ditu. Arga ibaiaren inguruan paseo bat eman ostean, parte hartzaileek hartzitutako elikagai hauetako batzuk partekatzen dituzte zeremonia moduko batean.

https://www.centrohuarte.es/aperitifak-fuegos-de-alto-grado-2/

Biologian erabiltzen den komentsalismo terminoak bi espezieren arteko harremanari egiten dio erreferentzia, non parte hartzaileetako batek (komentsalak) onura bat lortzen duen beste espeziea kaltetu edo onurarik eman gabe. Sarak elkarlanaren, cum mensa edo mahaia partekatzea, ideia horretarako hurbilpena egiten du eta gizaki eta mikroorganismoei aplikatzen die. Topaketak egiten ditu “elkar jan, irentsi eta digeritzeko, elkar onartzeko eta, agian, elkar ulertzeko”.