Atal honetan proposamen didaktiko batzuk erakusten dira. Arte-hezkuntzako profesionalek diseinatutako tresnak dira, artisten sormen-prozesuak eskoletan edota beste hezkuntza-testuinguruetan erabiltzeko.
Hitzak eta irudiak: arao bat.
Marrazketaren eta komikiaren arteko desberdintasunak ezagutzen ditugu?
Andrea Ganuzaren lanetik abiatuta, marrazketaren eta komikiaren hizkuntzaren aukerak hausnartuko dugu eta, era berean, beste marrazkilari batzuen lanetara hurbilduko gara, hala nola Powerpaola eta Ulli Lust artisten lanetara.
Ivan Brunettiren “Single-Panel Cartoon” ariketan oinarrituta, istorio bat kontatuko duen irudi bat osatzen ikasiko dugu, eta, gainera, ulertu egingo dugu testua nola txertatu, irudiak esanahi berri bat har dezan.
Helburuak
Andrea Ganuzaren obrara eta lan-prozesuetara hurbiltzea.
Komikiaren hizkuntzarekin ohitzea.
Marrazketa eta testua konbinatzeak eskaintzen dituen aukerekin jolastea.
Gozatzeko jolas-jarduera gisa ulertzea sormena.
Burbuila hiria
Zer ulertzen dugu hiri gisa? Nola eraikitzen da? Ez al da gizartean bizitzeko toki bat? Termino zabalak landuz, hala nola kolektibitatea eta hiri batek osatzen duen sarea, eta espazio publikoa eta espazio pribatua (etxebizitzak) nola ulertzen ditugun kontuan hartuta, hori islatuko duen Burbuila hiri bat eraikiko dugu. Maketatik eta kontzeptutik errealitatera egingo dugu salto, plastikoa eta bestelako materialekin, eta egitura gisa airea erabiliz.
Helburuak
Orekari Estudioren obrara eta prozesuetara hurbiltzea.
Hirietan ikusten ditugun elementuak aztertzea (hutsik dagoena vs eraikitako espazioa) eta hausnartzea.
Lan bat planifikatzen ikastea, aldez aurretik maketa bat sortuz eta, gero, errealitatera eramanez.
Bolumen batek espazio bat errotik nola eraldatzen duen hausnartzea.
Beste amets horiek
Mundu guztiak ditu ametsak, baina geroz eta urrunago bizi gara mundu onirikotik. Ametsak gogoratzeko, idazteko, haien bilduma egiteko, kontatzeko, partekatzeko, grabatzeko, argitaratzeko eta marrazteko moduak bilatuko ditugu.
Ametsak ezagutza-eremu gisa baloratuko ditugu, bizitako denbora deszifratzeko eta harengana hurbiltzeko aukera emango digun bizitzaren zati gisa.
Helburuak
Txaro Fontalbaren obrara eta sorkuntza- eta ikerketa-prozesuetara hurbiltzea, eta Sueñario proiektura ere bai.
Norberaren ametsetara ohitzen eta haietatik hurbilago egoten ikastea.
Ametsek zertarako balio diguten eta giza eboluzioan izan duten funtzioa aztertzea eta hausnartzea.
Prozesuan zehar, ametsak lehengai gisa erabiltzen dituzten sorkuntza-trebetasunak garatzea.
Norbait izateko argibideen kita
Paco Polánen obratik abiatuko gara artearen prozesuei buruzko gogoeta egiteko eta originaltasunaren eta bikaintasunaren kontzeptuak zalantzan jartzeko. Saiatuko gara ideia horiek gure egunerokotasunera estrapolatzen, eta argibideen kit bat sortzen esperimentatuko dugu, gu geu garena izatea lortzeko.
Helburuak
Paco Polánen obrara eta sormen-prozesura hurbiltzea.
Kontzeptu hauei buruz hausnartzea artearen esparruan: originaltasuna, bikaintasuna, balioa eta berregiteko gaitasuna.
Eskura dugunarekin sormen-esperientziak piztea., eta gauza artistikoei buruz dugun ideia zabaltzea.
Objektuak asmatzen, diseinatzen eta sortzen ikastea.
Artea bizitzari hurbiltzea eta alderantziz, modu ludiko baina gogoetazkoan.
Ezezagunaren eta posiblearen kartografia artistikoak
Nor gara? Zer irakatsi/ikasi nahi dugu? Nola egin dezakegu?
Askotan, mundua zatiketaren bidez ezagutzen saiatzen gara, zati txikitan banatzen eta zenbait irizpideren arabera sailkatzen. Gauza bera gertatzen da gure burua aurkeztu eta nor garen erakusten saiatzen garenean. Jatorria, adina, sexua... Baina badira definitzen gaituzten beste alderdi batzuek ere, gu geu bihurtzen gaituztenak, eta seguruenik komunitate bihurtzen gaituztenak. Ikusten zailagoak edota ezezagunagoak diren alderdiak dira, horregatik mapa-bisual edo kartografia artistikoetan biltzen saiatuko gara.
Helburuak
Irati Gorostidiren sormen- eta ikerketa-lan eta -prozesuetara hurbiltzea.
Elkar ezagutzea, gure iruditeria partekatzea, eta norbanakoaren eta taldearen identitateari buruz hausnartzea.
Kartografia ikaskuntzarako metodologia eta tresna gisa ulertzea.
Eskola-kurriculumari eragitea, ikasleen errealitate espezifikoei zuzenean lotutako eduki berriak proposatuz.
Eskola birpentsatu
Zer falta da eskolan? Zer gustatuko litzaiguke egitea eskolan? Talde moduan arituko gara eskolan erabiltzen ez den espazio bat bilatzeko. Prozesu parte-hartzaile baten bidez, gure beharrak eta nahiak identifikatuko ditugu, eta esanahi eta erabilera berriak esleituko dizkiogu espazio horri, guztion artean berreraikiz. Behar berriak asetzeko soluzioak bilatuko ditugu.
Helburuak
Orekari Estudioren obrara eta prozesuetara hurbiltzea.
Lan kolaboratibo eta parte-hartzailea sustatzea obra bat egiteko.
Eskolako espazioari buruz hausnartzea eta beste modu batean erabiltzea, zentzu berriak ematea.
Jasangarritasunaz kontzientziatzea.
Eskola baten kartografia
Kartografia kolaboratibo bat osatuko dugu teknika artistiko desberdinak erabilita. Formatu horrek gure eskolak edo institutuak osatzen duen lurraldean bizi dugun esperientziari (pertsonala zein kolektiboa) buruzko gogoeta sustatuko du.
Helburuak
Teresa Sabatéren obrara eta sormen-prozesuetara hurbiltzea.
«Bidea» eta «kartografia» kontzeptuetara hurbiltzea, gure identitatea eta lurraldea ulertzeko modu gisa.
Prozesu piktorikoak eta sormen plastikozko prozesuak esploratzea, taldekako lanaren ikuspuntutik.
Deriba-prozesu batean murgiltzea, premisa honen arabera: «Badakigu nola hasten garen, baina ez nola bukatzen dugun. Ez dugu emaitza zehatz bat bilatzen, aurkitzen dugunarekin ikasten dugu».
Joste-lanak eta konfidentziak: elkarrekin josi eta sortu
Joste-lan errazak egiten ikasi, eta teknikekin eta ehun-gaiekin esperimentatuko dugu instalazioak sortzeko gure inguruan. Elkarrekin egoteko unea izango da «josten» emango dugun denbora, baita jakinduria eta konfidentziak partekatzeko eta material berriekin esperimentatzeko ere.
Helburuak
María Jiménezen obrara eta lan-prozesuetara hurbiltzea.
Etxeko lanei dagozkien ehungintza-lanak ikastea, genero-roletatik haratago pertsonen arteko topaketa- eta zaintza-espazio gisa duten balioa berreskuratuz eta aldarrikatuz.
Askotariko ehungintza-material eta -teknikekin esperimentatzea, sormen-gai gisa.
Joskintzarekin lotuta dauden etxeko lanak ikertzea, haiei buruzko gogoeta egitea ikuspegi kritikotik, eta haien ondare-balioa aitortzea.
Hau naiz ni
Haurtzaroko oroitzapen batetik abiatuta, geure burua deskribatzen duen bideo bat sortuko dugu. Gero, kontzertu bisual bat egingo dugu: proiektatutako irudien gainean inprobisatuko dugu ahotsarekin, instrumentuekin, loopekin edo audio-efektuekin.
Helburuak
Peru Galbeteren obrara eta prozesuetara hurbiltzea.
Identitateari, memoriari eta denboraren iraganari buruz hausnartzea.
Esplorazio eta adierazpen baliabide gisa ahotsak ematen dituen aukerak ikertzea.
Ahotsarekin eta irudiekin lan egitea, bien arteko harremana sortuz.
Paperezko espazio aldatuak
Papera izango da gure sormenezko materiala. Euskarri gisa ematen zaion erabileratik harago, eskaintzen dituen aukera estetiko-plastikoekin esperimentatu, eta instalazioak, espazioak edo objektu aldatuak sortuko ditugu.
Helburuak
Elvira Palazuelosen obrara eta lan-prozesuetara hurbiltzea.
Obren analisiaren eta esperimentazio-ariketen bidez, lerro, plano, bolumen eta espazioaren kontzeptuetara hurbiltzea.
Papera bezalako material sinple bati balioa eta erabilera berriak ematea, hura baliatuta esperientzia sortzaileak biziz.
Ohartzea edozein material sormenez erabil daitekeela eta edozein errealitate fisiko eralda daitekeela.
Sortzeko teknika eta estrategia garaikideekin esperimentatzea, bakarka eta taldean.